Sameining - í orði en varla á borði.

     Eitthvað af þessum sameiningum stuðlar líklega að því að ná tilgreindum markmiðum. Hvað varðar Vestfirðina get ég hins vegar fullyrt að það þjónar engum tilgangi að sameina stofnanir á Patreksfirði og Ísafirði , samgöngur þarna á milli eru með þeim hætti marga mánuði ársins að það væri alveg jafn rökrétt að hafa sömu stjórn yfir starfsemi í Keflavík og Vopnafirði , þetta breytist ekki fyrr en í fyrsta lagi með göngum undir Hrafnseyrarheiði. Það er ekki út í bláinn að nefna sameiningu heilsugæslu á Vopnafirði og Keflavík til samanburðar. Ferðalagið frá Keflavík til Vopnafjarðar er hliðstætt því að fara frá Patreksfirði til Ísafjarðar að vetrarlagi. Frá Keflavík er fyrst 45 mín. akstur á Reykjavíkurflugvöll , flogið til Akureyrar og þaðan flogið til Vopnafjarðar. Frá Patreksfirði er ekið yfir 2 fjallvegi yfir á Bíldudalsflugvöll ( tekur 30 mín. við bestu aðstæður ) , flogið til Reykjavíkur og þaðan til Ísafjarðar .

      Þar fyrir utan er yfirbygging starfsemi á Patreksfirði í algjöru lágmarki , forstjóri hafði t.d. sjálfur frumkvæði að því eftir Hrun að minnka stöðugildi sitt niður í 50 %. Það er því tæplega mikla fjármuni hægt að spara með fækkun stjórnenda á Patreksfirði til að fjölga fagfólki.

       Ég veit að heimamenn á Patreksfirði hafa bent á þessar staðreyndir en í ráðuneytinu er greinilega ekki hlustað á málefnalegar ábendingar . Líklega eru spekingarnir í ráðuneytinu sem hafa unnið að þessu máli þeir sömu og létu sér detta í hug fyrir 2-3 árum að sameina læknavakt í Búðardal og Hólmavík , lítur líklega vel út í Excel en þeir sem ráða þessum málum verða að hafa einhverja lágmarksþekkingu á landafræði Íslands og samgöngum að sumri sem og vetri.  Þessi tiltekna sameining hefur því enga praktíska þýðingu en einungis einhvern táknrænan pólitískan tilgang.

 

 Tek fram að undirritaður hefur leyst af lækni á Patreksfirði bæði að sumri og vetri sem og lækni á Vopnafirði og tel mig því geta rætt þetta af nokkurri þekkingu.

„Þetta er bara ruddaskapur“